ਰਾਸ਼ਟਰਪਤੀ ਨੇ ਤਿੰਨ ਤਲਾਕ ਆਰਡੀਨੈਂਸ ਨੂੰ ਦਿੱਤੀ ਮਨਜ਼ੂਰੀ

ਨਵੀਂ ਦਿੱਲੀ – ਤਿੰਨ ਤਲਾਕ ਨਾਲ ਜੁੜੇ ਬਿੱਲ ਤੇ ਦੋ ਹੋਰ ਬਿੱਲਾਂ ਨੂੰ ਸੰਸਦ ਦੇ ਸਰਦ ਰੁੱਤ ਸੈਸ਼ਨ ‘ਚ ਪਾਸ ਨਹੀਂ ਹੋਣ ਕਾਰਨ ਮੁੜ ਲਿਆਂਦੇ ਗਏ ਸਬੰਧਿਤ ਆਰਡੀਨੈਂਸ ਨੂੰ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਨੇ ਸ਼ਨੀਵਾਰ ਨੂੰ ਮਨਜ਼ੂਰੀ ਦੇ ਦਿੱਤੀ। ਤਲਾਕ-ਏ-ਬਿਧਤ ਭਾਵ ਤਿੰਨ ਤਲਾਕ ਦੀ ਪ੍ਰਥਾ ਨੂੰ ਸਜ਼ਾਯੋਗ ਅਪਰਾਧ ਬਣਾਉਣ ਸਬੰਧੀ ਮੁਸਲਿਮ ਮਹਿਲਾ ਬਿੱਲ 2018, ਭਾਰਤੀ ਮੈਡੀਕਲ ਪਰਿਸ਼ਦ (ਸੋਧ) ਬਿੱਲ 2018 ਤੇ ਕੰਪਨੀ (ਸੋਧ) ਬਿੱਲ 2019, ਲੋਕ ਸਭਾ ‘ਚ ਪਾਸ ਹੋ ਗਏ ਪਰ ਇਨ੍ਹਾਂ ਨੂੰ ਰਾਜ ਸਭਾ ‘ਚ ਪਾਸ ਨਹੀਂ ਕੀਤਾ ਜਾ ਸਕਿਆ। ਇਸ ਲਈ ਮੰਤਰੀ ਮੰਡਲ ਨੇ ਪਿਛਲੀ 10 ਜਨਵਰੀ ਨੂੰ ਮੁੜ ਆਰਡੀਨੈਂਸ ਲਿਆਉਣ ਦਾ ਫੈਸਲਾ ਕੀਤਾ। ਤਿੰਨ ਤਲਾਕ ਤੇ ਮੈਡੀਕਲ ਪਰਿਸ਼ਦ ‘ਤੇ ਆਰਡੀਨੈਂਸ ਪਿਛਲੇ ਸਾਲ ਸਤੰਬਰ ‘ਚ ਤੇ ਕੰਪਨੀ ਕਾਨੂੰਨ ‘ਚ ਸੋਧ ਲਈ ਆਰਡੀਨੈਂਸ ਪਿਛਲੇ ਸਾਲ ਨਵੰਬਰ ‘ਚ ਲਿਆਂਦਾ ਗਿਆ ਸੀ। ਸੰਸਦ ਦੇ ਸਰਦ ਰੁੱਤ ਸੈਸ਼ਨ ‘ਚ ਤਿੰਨਾਂ ਨਾਲ ਸਬੰਧਿਤ ਬਿੱਲ ਲੋਕ ਸਭਾ ‘ਚ ਪਾਸ ਹੋ ਗਏ ਪਰ ਹੰਗਾਮੇ ਕਾਰਨ ਰਾਜ ਸਭਾ ‘ਚ ਜ਼ਿਆਦਾਤਰ ਸਮਾਂ ਕਾਰਵਾਈ ਰੁਕੇ ਰਹਿਣ ਕਾਰਨ ਉੱਚ ਸਦਨ ‘ਚ ਪਾਸ ਨਹੀਂ ਹੋ ਸਕੇ।